جے پور، 17 اپریل (یو این آئی) راجستھان میں لوک سبھا انتخابات میں اب تک 64 ہزار سے زیادہ بزرگ اور معذور ووٹروں نے گھر بیٹھے اپنے حق رائے دہی کا استعمال کیا ہے۔
ریاست کے چیف الیکٹورل آفیسر پراوین گپتا نے کہا کہ لوک سبھا عام انتخابات 2024 کے تحت ریاست میں 85 سال سے زیادہ عمر کے بزرگ ووٹرز اور 40 فیصد سے زیادہ معذوری والے ووٹر الیکشن کمیشن آف انڈیا کی پہل پر پہلی گھر بیٹھے ہی بار جوش و خروش سے ووٹ ڈال رہے ہیں اور ریاست میں اب تک ہونے والی ہوم ووٹنگ میں 64 ہزار 608 بزرگ اور معذور ووٹروں نے اپنا ووٹ ڈالا ہے۔ ان میں سے 48 ہزار 989 بزرگ اور 15 ہزار 119 معذور ووٹروں نے گھر بیٹھے ووٹ ڈالنے کی سہولت حاصل کی۔
مسٹر گپتا نے کہا کہ پہلے مرحلے میں 25 لوک سبھا حلقوں کے لیے 76,068 اہل ووٹروں کے فارم منظور کیے گئے ہیں۔ ان میں 58,659 بزرگ شہری اور 17,409 معذور افراد شامل ہیں۔ خصوصی پولنگ ٹیمیں ایسے ووٹرز کے گھر جا کر مکمل رازداری کے ساتھ پوسٹل بیلٹ کے ذریعے ووٹ ڈلوا رہی ہیں۔ لوک سبھا حلقوں کے پہلے مرحلے میں گھریلو ووٹنگ کے لیے ووٹنگ کا عمل 5 سے 13 اپریل تک جاری رہا۔ کسی وجہ سے گھروں میں رائے دہندہ کے ہوم ووٹنگ کے لیے موجود نہ ہونے سے دوسرے مرحلے کی پولنگ 15 سے 16 اپریل کے درمیان ہوئی تھی ۔
دوسرے مرحلے کے لیے ووٹنگ 14 اپریل سے 21 اپریل تک جاری رہے گی۔ دونوں مرحلوں میں اب تک 64 ہزار 608 ووٹرز اپنا ووٹ کاسٹ کر چکے ہیں جن میں سے 833 ووٹروں کی موت ہوچکی ہے اور 1422 ووٹرز غیر حاضر رہے۔ دوسرے مرحلے کے باقی ماندہ ووٹرز اگلے چار دنوں میں اپنا ووٹ ڈال سکیں گے۔
یو این آئی۔ این یو۔