پرتاپ گڑھ 28 مئی (یواین آئی ) پیس پارٹی کے قومی صدر ڈاکٹر ایوب سرجن نے کہا کہ بی جے پی کی مرکزی حکومت کی نو سال کی سب سے بڑی حصولیابی فسطائیت ،بے روزگاری و مہنگائی میں اضافہ ہے سرمائے داروں کے لئے کام کرنے والی مذکورہ حکومت میں جہاں سرمائے داروں کی دولت میں اضافہ ہوا ہے ،وہیں کچھ ملک چھوڑ کر فرار ہو گئے ۔جس ملک میں آئین و قانون کے برعکس فسطائیت کی بنیاد پر فیصلے لئے جاتے ہوں ،تو ملک کیسے وشواگرو بنے گا ،یہ غور و فکر کی بات ہے ۔ملک کو وشواگرو بنانے کے لئے برابری ،خیرسگالی و امن امان کی ضرورت ہے ،جس میں حکومت ناکام ہے ۔انہوں نے بی جے پی کی مرکزی حکومت کے نو سال پورے ہونے پر اپنے ردعمل میں مذکورہ تاثرات کا اظہار کیا ۔
ڈاکٹر ایوب سرجن نے کہا کہ جب سے بی جے پی اقتدار پر قابض ہوئی ہے ،اس نے پارٹی کے آئین پر زیادہ ،اور ملک کے آئین پر کم ترجیح دی ہے ۔بی جے پی اپنے پورے نو سال کے اوقات میں ووٹوں کی سیاست کے تحت پولرائزیشن کا کام کیا ہے ۔ترقی کے برعکس ہندو مسلمان کے مابین خلیج پیدا کر اپنے سیاسی مفاد کے لئے عوام کو گمراہ کرنے کا کام کیا ہے ۔آج بڑھتی مہنگائی و بے روزگاری سے عام عوام پریشان ہے ۔حالات یہ ہیں کہ اوسط درجہ کا سخص مالی طور پر ٹوٹ چکا ہے ۔اس کے سامنے ایک طرف کھائی تو دوسری طرف کنوا ہے ،وہ کیا کرے اس کے سامنے صرف خودکشی کا راستہ رہ گیا ہے ۔کرناٹک کی عوام مہنگائی بے روزگاری سے پریشان بی جے پی کے مذہبی ایشو کو مسترد کر ،جو منڈیٹ دیا ،اس کے نتائج دوسرے صوبوں کے انتخاب میں بھی دیکھنے کو ملے گا ۔انہوں نے کہا کہ بی جے پی آئندہ 2024 کے پارلیمانی انتخاب تک ابھی بہت سے مذہبی ایشو اچھال کر عوام کو گمراہ کرنے کا کام کرے گی ،مگر عوام اتنی پریشان ،اور ہندو مسلم سیاست سے اوب چکی ہے کہ اس کے سامنے اب روٹی کپڑا مکان کا ایشو ہے ۔ڈاکٹر ایوب نے کہا کہ حکومت کے اس نو سال کے اوقات میں عوام روز مہنگائی سے گھٹ گھٹ کر مرنے کے لئے مجبور ہے ،مگر حکومت مہنگائی بے روزگاری پر کنٹرول کرنے کے برعکس فسطائی پولرائزیشن کا کھیل کھیلنے میں مصروف ہے
یواین آئی - ع کریم خاں