نئی دہلی، 29 مارچ (یو این آئی) عام آدمی پارٹی (آپ) نے کہا ہے کہ اب اقوام متحدہ بھی پارٹی کے کنوینر اور دہلی کے وزیر اعلی اروند کیجریوال کی حمایت میں آگے آگیا ہے آپ نے جمعہ کو کہا کہ عالمی سطح پر مسٹر کیجریوال کی حمایت میں اٹھنے والی آوازیں اس بات کا ثبوت ہیں کہ انہوں نے حقیقی عوامی خدمت اور انقلابی ترقی کے تئیں اپنے عہد کو کیسے پورا کیا ہے۔
آپ کی پنجاب یونٹ نے سوشل میڈیا پلیٹ فارم پر اقوام متحدہ کے سیکرٹری جنرل انٹونیو گوٹیرس کے ترجمان اسٹیفن ڈوجارک کی ویڈیو جاری کی، جس میں انہوں نے کہا ’’ہم امید کرتے ہیں کہ ہندوستان میں دنیا کے کسی بھی دیگر ملک کی طرح انتخابات میں آئینی اور سیاسی حقوق کا تحفظ ہو اور انتخابات آزادانہ اور منصفانہ طریقے سے کرائے جائیں۔
مسٹر دوجارک نے کہا کہ انہیں امید ہے کہ ہندوستان اور کسی بھی دیگر ملک میں جہاں انتخابات ہو رہے ہیں، لوگوں کے سیاسی اور شہری حقوق کا تحفظ کیا جائے گا اور ہر کوئی آزادانہ اور منصفانہ ماحول میں ووٹ ڈال پائے گا۔
ترجمان نے یہ باتیں جمعرات کو دہلی کے وزیر اعلیٰ اروند کیجریوال کی گرفتاری اور حزب اختلاف کی جماعت کانگریس کے بینک کھاتوں سے لین دین پر پابندی کے تناظر میں آئندہ لوک سبھا انتخابات سے قبل ہندوستان کی سیاسی صورتحال سے متعلق ایک سوال کے جواب میں کہیں۔
آپ نے ایک بیان میں کہا کہعوامی خدمت اور ترقی کے وعدوں کو صحیح معنوں میں پورا کرنے والے مسٹر کیجریوال کی حمایت میں پوری دنیا سے آوازیں اٹھ رہی ہیں۔
یو این آئی۔ این یو۔