نئی دہلی، 29 نومبر (یو این آئی) عام آدمی پارٹی (آپ) کے قومی کنوینر اور وزیر اعلی اروند کیجریوال نے منگل کو کہا کہ اگر راجدھانی کے لوگ ان کی پارٹی کو کارپوریشن میں موقع دیتے ہیں تو وہ اگلے پانچ سال میں دہلی کو صاف ستھرا بنا دیں گے مسٹر کیجریوال نے آج چراغ دہلی میں گھر گھر مہم کے دوران کہا کہ دو کروڑ دہلی والوں کے ساتھ مل کر وہ دہلی کو صاف ستھرا اور خوبصورت بنائیں گے۔ اس بار دہلی کے لوگ آپ کو کارپوریشن میں موقع دینے کے لیے تیار ہیں۔ انہوں نے کہا، "جب میں دہلی میں ہر جگہ کچرا دیکھتا ہوں تو مجھے بہت تکلیف ہوتی ہے۔ وزیر اعلیٰ ہونے کے بعد بھی میں کچھ نہیں کر پا رہا، کیونکہ یہ کام کارپوریشن کا ہے۔ اگر آپ کی حکومت بنتی ہے تو ہم گھر گھر کچرا اٹھائیں گے۔ سڑکوں، گلیوں اور نالوں کی صفائی کرائیں گے۔
وزیر اعلیٰ نے چراغ دہلی میں گھر گھر مہم کے دوران نامہ نگاروں کو بتایا کہ انہوں نے سال 2013 میں پہلا الیکشن لڑا تھا، تب چراغ دہلی آئے تھے۔ اس وقت یہاں کے لوگوں کو پانی کی بہت پریشانی تھی۔ حکومت بننے کے بعد یہاں کے لوگوں کو پانی کی سہولت فراہم کی گئی ہے جس سے لوگ بہت خوش ہیں۔ یہاں ایک محلہ کلینک کھلا ہے۔ محلہ کلینک میں لوگوں کا اچھا علاج اور مفت ادویات مل رہی ہیں۔ یہاں ایک سرکاری سکول ہے۔ لوگ سرکاری سکول سے بہت خوش ہیں۔ عوام کے بجلی کے بل زیرو آرہے ہیں۔
انہوں نے کہا، "دہلی کے لوگ آپ کو لے کر بہت پرجوش ہیں اور وہ بہت خوش ہیں۔ دہلی کے لوگ پچھلی بار سے زیادہ جوش و خروش کے ساتھ اس بار آپ کو ووٹ دیں گے۔ کارپوریشن میں آپ کی سیٹیں 230 سے ​​زیادہ ہونی چاہئیں اور بی جے پی کو 20 سے کم سیٹیں ملیں گی۔
یو این آئی۔ ع ا۔